“Айж суух биш, хүн бүр хичээж амь насаа хамгаалах цаг ирээд байна” | News.MN

Covid-19 халдварын тархалт Хятадын эх газарт харьцангуй тогтворжоод байгаа ч бусад улс орнуудад газар аваад байна. Өнөөдрийн байдлаар /2020.02.28/ дэлхийн 50 орчим улс оронд 83,074 хүн  халдвар авсан байгаа бол 2,858 нас баржээ. Харин бүрэн эдгэсэн хүний тоо 36,486 болсон байна.

Халдвар авсан хүний тоогоор Хятадаас гадна Өмнөд Солонгос, Итали, Япон, Иран, АНУ, Герман улсууд  тэргүүлж байна. Эдгээр улсуудад сүүлийн хэдхэн хоногийн дотор халдварын тоо огцом өсөөд байгаа юм. Мөн Дани, Ромын, Бразил, Нигер улсуудад анхны тохиолдол бүртгэгджээ. Ингэснээр бусад улс орнуудад бүртгэгдсэн халдварын тоо хоёр дахь өдрөө Хятадаас илүү гарч байна.

Энэ цаг үед ДЭМБ-ын дарга Тедрос Адханом мэдэгдэл хийж “Дэлхий нийтийн өмнө шийдвэрлэх цаг үе ирээд байгаа”-г сануулав. Мөн тэрбээр халдвар хурдацтай тархаж буй улс орнуудын эрх баригчдыг шийдэмгий, түргэн шуурхай ажиллахыг уриалжээ.

“Үнэндээ яг одоогийн байдлаар бид тахалтай хэрхэн тэмцэж байгаагаас шалтгаалан нөхцөл байдал хаашаа ч эргэж болзошгүй болоод байна. Одоо бол айж суух цаг биш. Харин дор бүрнээ хичээж, халдвараас өөрсдийгөө сэргийлж, амь насныхаа төлөө тэмцэх цаг ирээд байна” хэмээн Тедрос Адханом хэлсэн байна.

Дэлхийн улс орнууд дараах арга хэмжээг авч байна.

  • Саудын Араб мөргөлчдийн урсгалыг зогсоов
  • Иран улс иргэддээ шаардлагагүй тохиолдолд аялахгүй байхыг уриалж, нийслэл Тегеран болон бусад хотуудад болох байсан мөргөлүүдийг зогсоов
  • Австрали улс Хятад улсаар аялсан жуулчдыг хүлээн авахаас татгалзав
  • Итали улсад 11 хот бүрэн хөл хорионд оров
  • Грек улс бүх багт наадам, олон нийтийг хамарсан арга хэмжээнүүдээ цуцлав
  • Япон улс ерөнхий боловсролын бүх сургуулиудаа хаврын амралт хүртэл хаах шийдвэр гаргав. Хятад,Хонгконг ч мөн адил арга хэмжээ аваад байгаа билээ. Японд хаврын амралт дөрөвдүгээр сард эхэлдэг юм. Япон улс 13 сая орчим сурагчтай ба өдөр өнжүүлэх, хүүхэд харах үйлчилгээ хэвийн ажиллах юм байна.
“Болор дуран”-аар шалгав.

Original content at: https://news.mn/
Authors:

Leave a comment

Your email address will not be published. Required fields are marked *